منتدى رجال الأعمال
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


On over The years
 
الرئيسيةالبوابةأحدث الصورالتسجيلدخول

 

 والله.....محتاجكم

اذهب الى الأسفل 
كاتب الموضوعرسالة
كلمة السر




المساهمات : 2
تاريخ التسجيل : 09/08/2009

والله.....محتاجكم Empty
مُساهمةموضوع: والله.....محتاجكم   والله.....محتاجكم Icon_minitimeالأحد أغسطس 09, 2009 5:30 pm

السلام عليكم ورحمة الله وبركاته

إخواني وأخواتي الأفاضل / .....................................
أتمني من الله العلي القدير أن ينعم عليكم بالصحة والعافية وان يعيد عليكم وعلي أهل بيتكم هذة الأيام الكريمة المباركة بكل الخير وان يباعد بينكم وبين كل مكروه كما باعد بين المشرق والمغرب وان يرزقكم شفاعة حبيبكم محمد صلي الله عليه وسلم .
أولا أنا آسف جداً لو كان كلامي هيكون كتير عليكم بس اعذروني لأني بجد محتاجكم ومش عارف موقفكم هيكون ايه من مشكلتي لكن الأمل في الله . أسئلة ياما بدور في عقلي بس ياريت حضرتكم تعرفوا إني دلوقتي وبصدق مع الله مليش غيركم من بعد ربنا وياريت كلامي يفضل بيني وبينكم ليوم الدين .
مع إننا ما نعرفش بعض عندي أمل في الله انكم تعتبروني زي واحد من خواتك وتمدوا ايديكم وأجركم وثوابكم من الله لأني بصراحة معنديش غير إني ادعي لكم .
أنا شاب عندي اتنين وتلاتين سنة ومدرس إعدادي ومش متجوز . أنا من عيلة وبيت بسيط جداً عايش يادوب بالعافية والدي شغال بالأجر اليومي وكمان كبر في السن وكلها سنة ولا اتنين ومش هيقدر يشتغل تاني . عشان زمان الناس ما كانتش بتفكر في بكرة طلعت لقيت خواتي سبعة صبيان علي بنات وأنا الكبير وكان لازم أشيل المسئولية بدري قوي .
اتبهدلت ياما وياما بكيت عشان اشتري ولو شراب بالرغم من إني كنت شغال من وأنا عندي ست سنين لكن عددنا الكبير كأولاد وأسرة حرمنا كلنا من كل حاجة حلوة والله لحد النهاردة البيت عندنا مفهوش غير تلفزيون جبته كمان بالتقسيط لما اشتغلت وبنحاول علي قدي اعدل من وضع بيتنا وشكلنا قدام الناس بس الحمل صعب قوي .
وضع البيت عندنا كان ولسه صعب قوي يمكن الشهرين بيعدوا واللحمة دي ما تعرفش طريق بيتنا. قاعدين دلوقتي في شقة بالإيجار وربنا عالم عايشين ازاي طبعا عشان الظروف الصعب دي تلاتة من خواتي طلعوا من التعليم ويمكن لو كانوا كملوا كانوا هيكونوا أفضل بس دي حكمة ربنا واللهم لا اعتراض ومفيش إرادة بعد إرادة ربنا.
كافحنا كلنا عشان نعيش . كلنا كنا بنشتغل صبيان وبنات لكن بردوا أبويا كان عنده شوية إهمال فينا والمصيبة انه كان شايف نفسه دايما صح . أنا عمري ما نفتكر إن أبويا اشتري لحد فينا حاجة يفرحوه بيها في مناسبة أو غير مناسبة .
كان لازم إن البنات خواتي يتجوزا وبصراحة أول واحد اتقدم لكل واحدة من البنات التلاته وافقنا عليه من غير تردد بصراحة حتى البنات كانوا عايزين يخلصوا من العيشة دي بأي شكل جهزناهم جهاز علي قد الحال طبعا بالتقسيط وشفت المر بجد في التقسيط دا بس ما كانش فيه حل تاني غير كده .
أمي بقي دي حكاية طويلة ست طيبة ملهاش حد في الدنيا بحالها غيرنا وأنا بالأخص لأني بنحبها وحنين عليها اكتر من خواتي كلهم عشان هما دايما بيلوموها علي إنها كانت ممكن تخلينا أحسن من كده لو كانت خدت موقف من أبويا . كان لازم أمي تمرض وفعلا مرضت بالسكر والضغط والقولون وخلعت سنانها كلها وصدقني والله منظر وشها بيصعب لما تبصوا في عنيها. وكمان السكر بهدلها وبدأت الغرغرينة تمشي في جمسها وأنا مش عايز احسسها بكده عشان علي الأقل تفضل جنبنا .
وأختي الكبيرة مرضت بالقلب وعملنا ليها عملية في مستشفي الجامعة في إسكندرية علي نفقة الدولة وقرر الدكاترة إنها مش هتقدر تتجوز وعشان كده قعدت في البيت لحد دلوقتي وصلت سته وتلاتين سنه وطبعا خلاص كلنا عرفنا إنها مش هينفع تتجوز وبحاول معاها علي قد ما اقدر عشان هي ماشية بالعلاج وعندي اخويا محمد بيشغل في دهانات الموبليا يوم شغال وعشرة لا واخويا هيثم لسه في التعليم.
أختي الأخيرة واصغر واحدة في البنات اتجوزت من حوالي سنتين طبعا زي ما أنا قلت الحالة يعملها ربنا اجلنا فرحها كام مرة لغاية ما وقفت علي الطلاق لأني شايل حمل كبير وكمان أنا لسه كمدرس بادي حياتي مرتبي بسيط وبعدين موضوع الدروس بتكون أرزاق من ربنا وأنا مؤمن بكده يمكن لوكان دخلي لنفسي كان بقي وضعي أحسن من كده وكنت علي الأقل وفرت أي حاجة لكن والله ما كان فيه حاجة متوفرة لان كل حاجة أنا شايلها . وعشان أنا طبعا منقدرش نشيل حمل تاني وهو إن يبقي عندي أخت مطلقة عملت قرض من البنك بضمان الوظيفة كان حوالي سبع آلاف جنية ومع إني هسدد القرض دا تقريبا الضعف طبعا معملش حاجة وحضراتكم عارفين يعني ايه جواز بنت اليومين دول . استلفت من زمايلي ناس وثقت فيا وناس طبعا مضيت ليهم إيصالات أمانة لأننا ما تعاملناش مع بعض في فلوس قبل كده . استلفت حوالي ست آلاف جنية علي دفعات يعني كان عشان اعدي الجوازة دي علي خير ومن يومها بدأت مشاكلي محدش طبعا حاسس بيا مرتبي نزل النص عشان البنك بيخصم مني مبلغ كبير وكان كل اللي فاضل أول عن أخر حوالي 300 جنية طبعا دول المفروض يعملوا كل حاجة يعني أعيش منهم وكمان أسدد ديون الناس . استعنت بربنا وأول ما بدأت أسدد من رزق الدروس ربنا رزقني بشوية مرض حاولت اصبر لكن المرض زاد قوي وكان لازم أشيل كليتي اليمين ودلوقتي انا عايش بكلية واحدة اتحرمت من أكل وشرب ياما عشان أحافظ علي الكلية التانية ومش عارف الأيام هتوصلني لفين ؟ كان نفسي اسيب ولو مكان صغير لامي وأختي من بعدي يعيشوا فيه بدل الإيجار .
طبعا مش عارف اعمل ايه أسدد دويوني ولا أشوف مصروف البيت ولا اصرف علي مرضي ومرض أمي وأختي وهموم الدنيا كلها فوق راسي بستلف من فلان وأسدد فلان وأمد ايدي لكل واحد يعرفني وأديني علي كده بقي لي سنتين . والله العظيم ما في حد في بلدنا اسمي ما خدت منه فلوس بس اعمل ايه يعني ؟ رزقي كده وكمان ياريت نقدر نشتغل أي شغل تاني عشان أنا صحتي في النازل مش عارف اعمل ايه ؟عايش مذلول بالديون وبالسلف من الناس . مليون مرة فكرت في الانتحار عروز ارتاح أو اسيب البلد وامشي وأنا مش عارف أروح فين ولا لمين ؟
كل زمايلي اتجوزوا ومعاهم عيال كمان ودا موضوع ماثر فيا نفسياً قوي بس اعمل ايه دا أنا مش عارف اشتري قميص وبنطلون ولا جزمة حتى ومنقدرش نقول غير الحمد لله علي كل حال .
أنا بتكلم مع حضرتك دلوقتي ومش عارف ايه موقفك بس صدقني والله أنا كل أملي في الدنيا دي إني أسدد ديون الناس عندي وأعيش حياتي برزق ربنا ومش عايز غير كده . يعني كل مشكلتي دلوقتي هي ست آلاف جنية ديون الناس عندي . ديون مش عرف أشم نفسي منها بنام واصحي علي ذل في ذل وكمان مش عرف أشوف شغلي زمايلي اتقدموا من حواليا وانا مش عارف نعمل حاجة أنا عارف إن المبلغ دا مش بسيط بس أنا منتظر رحمة ربنا من قلب حضراتكم وأملي في الله إنكم تفكوا كرب إنسان محتاجكم ويمكن يكون ربنا باعته ليكم .
( إن لله عباداً اختصهم بقضاء حوائج الناس )
إخواني وأخواتي الأفاضل /.......................
هي دي مشكلتي وهي دي ظروفي بكل أمانة خاصة إن نص ديني لازم يسدد للناس قبل يوم الجمعة الجاية يعني يوم 14 / 8 / 2009 إن شاء الله أو مش عارف ايه اللي هيحصل ولو حضراتكم قررتم تساعدوني صدقوني ربنا هيعوض عليكم وكفاية انكم مش بتنقذوني لواحدي أنتم بتنقذوا أسرة وكمان أنا تحت أمركم في أي حاجة إن شاء الله أعيش خدام ليكم طول عمري وكمان مستعد لأي ضمانات لو حتى بحياتي كلها بس ارحموني ربنا يبارك لكم في أولادكم ومالكم وصحتكم وبيوتكم بس أنقذوا واحد كل أمله يعيش بين الناس بالحلال ومش مهم أي حاجة تانية .
وفقكم الله لكل ما يحبه ويرضاه
عماد
0108067676
الرجوع الى أعلى الصفحة اذهب الى الأسفل
 
والله.....محتاجكم
الرجوع الى أعلى الصفحة 
صفحة 1 من اصل 1
 مواضيع مماثلة
-

صلاحيات هذا المنتدى:لاتستطيع الرد على المواضيع في هذا المنتدى
منتدى رجال الأعمال  :: الفئة الأولى :: ::: وزارة الخارجية :::-
انتقل الى: