منتدى رجال الأعمال
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


On over The years
 
الرئيسيةالبوابةأحدث الصورالتسجيلدخول

 

 من اروع التتبيلات

اذهب الى الأسفل 
كاتب الموضوعرسالة
Admin
Admin
Admin


المساهمات : 72
تاريخ التسجيل : 27/04/2008

من اروع التتبيلات Empty
مُساهمةموضوع: من اروع التتبيلات   من اروع التتبيلات Icon_minitimeالجمعة فبراير 05, 2010 7:03 am

كباب و كفتة و فراخ مشوية هتاكلوا صوابعكم وراها ان شاء الله بس ادعولي
Share

السلام عليكم

ازيكم يا بنوتات

انا اخدت الوصفة من حماتي و هي الكباب بتاعها تحففففففففففة ماشاء الله


المهم انا عملتة من يومين و طلعت حلوة الحمد لله و قلت اشارككم بالوصفة بس عاوزة دعوة بظهر الغيب ان ربنا يوفقني لكل ما اتمناة و اريدة لو كان خير لي طبعا


ندخل في المهم بقي انا عارفة انكم جعتوا

بالنسبة للكباب لازم يكون نوع لحم جيد جدا و فية دهن بسيط و يكون متقطع مربعات صغيرة بحجم بيضة صغيرة تقريبا كدة

التتبيلة لكيلو لحم ضاني او اي نوع لحم بس مهم زي ما قلت جودة اللحم في المقام الاول:


2 بصلة متوسطة مضروبة في الكبة لحد ما تبقي مهروسة و سائلة نوعا ما مش عصير طبعا و بعدين نعصر عليها من 2 الي 3 ليمونات وسط و نضيف ملح و فلفل و بهار و قرفة و ملعقة كبيرة خل و ملعقة كبيرة زيت و ورق لاورا و يترك فيها اللحم لمدة 3 ساعات مثلا او طول الليل ان امكن
ثم تشك في الاسياخ المعدنية بشكل جيد بحيث متكونش خارجة لبرة قوي علشان متتحرقش الاطراف علي الفحم


تتبيلة الكفتة:

اولا الكفتة مفروض يكون فيها نسبة دهن معقولة حتي لا تتفكك و انا حطيت علي كيلو من اللحم المفروم حوالي 2 بصلة متوسطة مبشورة ناعم و ملح و فلفل و بهار و قرفة و جنزبيل مبشور و بابريكا و بقدونس مفروم ناعم و 2 ملعقة كبيرة نشا و ملعقة صغيرة زيت و تصبع علي معلقة خشب علشان يبقي شكلها مخروم من المنتصف زي بتاعة المحلات و كمان تستوي من جوا أسرع
توضع في الثلاجة لتتماسك كمان و بعدين حطيتها في رف بتاع الشوي زي اللي بنحط فية الفراخ بس عميق شوية بحيث الكفتة تظل علي شكلها و تفضل متصبعة زي ما هي بس قبل ما تحطيها ادهني الرف بشوية زيت لان الكفتة لو لزقت و جيتي تطلعيها شكلها هيبوظ و مجهودك كلة هيضيع



تتبيلة الفراخ المشوية:


اولا خلي الفرارجي يقطع لك الفراخ للشوي و يفتحها كويس علشان تستوي من جوا و اديها وقتها علي النار لانها ممكن جدا تستوي و تاخد لون يديكي احساس انها استوت و لكن اللحم من جوا جنب العظم هيكون نئ و فية شوية دم

كمان تكون حجمها مش كبير و لا صغير قوي و لكن وسط


التتبيلة هي:



في الخلاط ضربت 2 بصلة كبيرة مع طمطماية كبيرة و ملعقة كبيرة كتشب و ملعقة زيت و عصير 3 ليمونات و 2 ملعقة كبيرة خل و ملح و فلفل و بهار و قرفة و بابريكا و ممكن اضافة القليل من الريحان او الزعتر المطحون و ورق لاورا و جنزبيل مطحون و تسيبيها فيها اطول فترة ممكنة ثم توضع في رف الشوي و فوق الفحم
( التتبيلة دي لكمية حوالي فرخة و نصف او فرختين وسط)

لمزيد من النكهة ممكن تفضلي تدهني الفراخ بالتتبيلة خلال الشوي هتديها نكهة أكبر ( بس مين فايق يعمل كدة!!!)


طبعا لما تيجي تقدمي الكباب و الكفتة مهم قوي ترشي عليهم بقدونس مقطع صغير بيخليكي تحسي انه اكل مطاعم و كمان بيبقي طعمة حلو قوي خصوصا مع الكفتة

اما الفراخ فممكن تزيني حواليها بشرائح خيار و ليمون او تحطي تحتها قطع عيش شامي محمص او شيبسي بالملح



قدمي معاهم سلطة بلدي و طحينة و ممكن تبولة او سلطة زبادي و عيش بلدي و شوية بطاطس محمرة

و ياسلام لو الحلو بعدها رز بلبن او ايس كريم يطري بعد الاكل التقيلة دي و خصوصا في الحر اللي احنا فية دة و الله يكون في العون



نصائح عامة:

اولا يستحسن تتبلي كل حاجة و تحضري كل حاجة من قبلها بيوم و خصوصا لو كانت عزومة لان مجهود الشوي بيكون كبير و خصوصا مع المواعين و التجهيز و التقديم و لم الاكل بعدها


ثانيا ممكن لو عندك طشط غسيل كبير و مستطيل تنقعي فية كل رفوف الشوي و الاسياخ و الصواني اللي طلعتي فيها الحاجات مع شوية خل و سائل مواعين لحد تاني يوم لان غسيلها هيكون أسهل بكثير و خصوصا رفوف الشوي لان الدهن و الجلد بيلزق فيها و بتبقي فعلا متعبة في الغسيل


ثالثا يفضل يكون معاكي حد يساعدك خلال الشوي انتي تحطي الحاجت و شخص تاني يهوي و يقلب مثلا و هكذا لان لو لوحدك ممكن الحاجة يأما تطلع مستوية اقل من المفروض او أزيد من المفروض


رابعا لو حسيتي ان الحاجة بدأت تسود من برة بسرعة حاولي ترشي شوية مية بسيط علي النار لو كانت عالية قوي بس بحرص لحسن تتطفي و برضة ممكن تقلبي الحاجة أكثر علشان تاخد سوا بدون ما تتحرق أكثر


خامسا تاني يوم لازم تاكلي اي حاجة لانك هتكوني مرهقة شوية اكثر من العادي فممكن بقي بواقي او تديها تونة و فول و كلام من دا ( هو انتي هتتعبي لهم كل يوم و لا أية؟؟!!! )


سادسا ياريت اللي يعمل الاكلة دي يبقي يصورها و يحط صور لاني نسيت خالص اصور يومها بس كانت تستحق التصوير صراحة


و اخيرا اللي عاوزة تثبت نفسها قدام حماتها او قدام اهل زوجها فدي افضل اكلة للغرض دة لانها محتاجة خطوات كثير و مش كل واحدة فنانة في الشوي و كمان مش كل الناس عندها بلكونة ممكن تشوي فيها او شواية كهربا في البيت فهتبقي حاجة متميزة ان شاء الله
الرجوع الى أعلى الصفحة اذهب الى الأسفل
https://karamstyle.yoo7.com
 
من اروع التتبيلات
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى رجال الأعمال  :: الفئة الأولى :: ::: وزارة الترفيه :::-
انتقل الى: